بقلم/ اسلام توفيق

 بعد اذن الادمن تقييم يا شباب للاسكتش ده ..

سكتش جديد:

= انت عارف تفاصيل المقابلة دي ولا تحب اشرحلك يا استاذ احمد ؟ 

- الحقيقة سارة هي اللي أصرت اللي انا اجي لحضرتك  ومفهمتش حاجه بس اوكيه ممكن تفسرلي انا ليه هنا .

= بإختصار شديد انا دكتور ابراهيم ..

- اه .. يعني سارة عندها مشاكل تمنعها تخلف  وحبت تصارحني بحاجه زي كده قبل ما نبدأ حياتنا وعلاقتنا ببعض؟

= الحقيقه لا 

- عندها مشاكل تمنعها تتجوز

= لا انت فهمت غلط 

- متقولش عندها كانسر .. لا حول ولا قوة الا بالله 

= يا حبيبي اصبر .. افهم ..انا دكتور ابراهيم دكتور نفسي .

- ما تقول كده يا دوك من الاول 

= هو انت مديني فرصه اقول 

- بس يا دكتور انا اه لسه معرفش سارة غير من اسبوعين بس مش باين عليها أي أعراض نفسية .

=الحقيقه انت اللي هنا عشان هي اللي تتطمن أن انت اللي معندكش اي مشاكل نفسية .

- نعم !!!!

= خلينا اشرحلك .. انسه سارة ارتبطت ف حياتها قبل كده ٥ مرات وللاسف كلها تجاربها باتت بالفشل .

-  مش فاهم ايه علاقه ده بحضرتك ..

= هفهمك انا بحلل الشخصيات وبصفتي دكتور النفسي والشخصي لانسه سارة اقدر احددلها .. إذا كان الشخص اللي هو انت مناسب ليها ولا لا..

-ومين قالك إن فيه حد هيوافق ع الكلام اللي انتوا بتعملوه ده  ؟ 

= ال١٦ اللي قابلك واقفوا 

- اللهم صلي ع النبي هو كان فيه ١٦ قبلي 

= واترفضوا كلهم...

- ربنا يبشرك بالخير

= استاذ احمد .. عشان منضيعش وقتي ووقتك انت بتحب انسه سارة ومستعد نكمل مقابله وتتقيم ولا لا ؟؟

- هو انا لو مش بحبها كنت كملت دقيقه هنا ..

= تمام .. يبقي نبدأ الاختبار .. الموضوع سهل وبسيط هساءلك من ٥ ل٧ اسئله وحضرتك هتجاوب ومن خلالها هنقدر نقيم إذا كان العلاقه هتنجح بينك وبين انسه سارة ولا لا ..

- تمام .. اتفضل حضرتك ..وربنا يستر ..

= اول سؤال حضرتك بتحب ف الفرخة الصدر ولا الورك ؟؟؟

- نعم !!.. لا انتوا بتهرجوا بقي .. 

= حضرتك مفيش اي تهريج انا جاد فعلا ف اسئلتي والاسئله دي هي اللي توصلني اعرف علاقتكم هتنجح ولا لا ...

- اممم . يعني اللي هيقرر مستقبلي وحياتي إذا كنت بحب صدر البطة ولا ورك الديك ... لا انا مش هكمل .

= احب افكرك أن انسه سارة بتثق ف كلامي جدا وبمجرد ما هحط علامه × ع اسمك .. مش هتعرف توصلها تاني ..

- تمام .. بالنسبه للفراخ انا نباتي اصلا .. اكلي كلوا بنسب ومعايير ومواصفات معينه ..

= بدايه مبشرة .. السؤال التاني مؤخرا نسب الطلاق ف المجتمع زادت بطريقه سريعه جدا .. تفسر ده باءيه ..

- قلة وعي من الشباب 

= ممكن تفسرلي 

- هقولك ..دلوقتي مين بنسبه اكبر ف ايدوا يرمي يمين الطلاق أو انهاء العقد ما بينهم الزوج ولا الزوجه ؟؟

= الزوج

- عظيم ... يبقي هو السبب .. مهما حصل انا مطلقش . معروف عن الستات .. دماغهم  فاصوليا .. فاءنا احتويها .. ازاي بعد ما اكون أسرة وتجهيزات وعيشرة ونيمي الولاد بدري يا بيبي انا جاي ف الطريق ..

=نعم 

- مقصدش .. المهم السبب الرئيسي هو الزوج ..

= ممتاز .. السؤال الثالث 

 شايف لبس المرأة حريه شخصيه ليها ولا إجبار بحدود 

- لا . انا هنا بقي عندي وجهه نظر مختلفة معلش اديني وقتي 

=  اتفضل سامعك 

- المرأة من حقها تلبس اي حاجه مهما كانت .. شوف مهما كانت ..

بس هنا دور الزوج أو المسؤال عنها .. بذكاء شديد يقدر يوجها لو شاف حاجه ملفته حاجه عريانه .. هنا بكل لطافه . الله الطقم ده حلو عليكي بس .يعني لو غيرنا هنا عشان عريان .. لو طولنا هنا بحاجه تانيه عشان قصير ... انا بخاف عليكي ودمي بيغلي لو حد باصلك فطبيعي انتي جميله وزي القمر فمينفعش نلبس غير اللي يزدنا جمال وعفة ...

= هاهاها .. هي انسه سارة لقيتك فين .. 

- نعم 

= اقصد اتعرفتوا ازاي ؟؟

- الحقيقه .. صحبة  اختي ومكنتش اعرفها  .. اختي رشحتهالي .. بس اختي  مقلتليش أنها هتعملي اختبار الحقيقه لما اروحلها اختي  الجزمة  .

= تمام فاضلنا سؤالين ونكون خلصنا المقابله متقلقش ..

- ع الله بس يا دكتور مكنش زي ١٦ اللي قبلي .. واترفض ..

= ده اللي هيقرروا اجابتك ع السؤالين الجايين ..

- ايه امتحان الثانويه العامه ده يا ربي .. ايه القرف ده 

= افندم 

- اقصد ايه السؤالين كمل يا دكتور 

=  هو سؤال مرتبط بسؤال ... انت ارتبط ف حياتك كام مرة .

- مرة يا دكتور 

= تقدر تحكيلي مكملتش ليه 

- مبتحبش الاهتمام الزياده يا دكتور

= فيه حد مبيحبش الاهتمام 

- اه .. هي يا دكتور .. كانت بتتخنق لما اتصل كل ساعه عشان اطمن عليها واشوفها كلت ولا .. كانت بتتخنق لما اطلب منها نخرج كل اسبوع .. كانت بتضايق لما اقولها كلام رومانسي باستمرار .. كانت بتزهق لما اقولها عاوز اقابل باباكي ونحدد ميعاد عشان اجيب والدي ووالدتي وتبقي رسمي ...

= انت والدك ووالدتك فاضيين الجمعه الجايه

- بجد يا دكتور انت شايفني شخص مناسب

.

= طبعا .. انشاء الله هستناك انت واهلك يوم الجمعه الجايه وهبعتلك اللوكيشن تنورونا ف البيت ف شبرا ..

- شبرا .. اللي انا اعرفوا يا دكتور أن سارة ساكنه ف الدقي 

= سارة مين يا ابني .. انا هجوزك بسنت بنتي ....